जमीन नांगरली, वखरली अन माती अशी भुसभुशीत की हवेलाही मोह होऊन हवा त्या मातीला तिच्या सोबत दूरवर घेऊन जात मुक्त उधळण करावी. पहिला पाऊस पडल्यावर त्याच मातीने अत्तराची ख्याती सांगावी इतपत सुखावणारी माती अन त्या मातीला आपली माय मानणारा माणूस म्हणजे बळीराजा नावाचा एक अनोखा प्राणी. दरवर्षी भरभरून देणारी माय-माती कधीतरी हिरावून घेईल का? असे अनेकानेक प्रश्न सतत पाठलाग करतच असतात. म्हणतात की जेवढं जास्त सुख वेचल तेवढ्याच पटीच दुःख माग घेत येत असते; पण ज्याने सुखच वेचल नसेल त्याच काय? हाही कळीचा प्रश्न कायम सतावत असतो.