(बालकविता) *प्रसाद मोदक झाला....* माझ्या नांगराने ढेकूळ गणपती केला पण्यापावसाने मातीत विरून गेला त्याच्या विरण्याने ताकद मातीला आली कोंब दाण्याचे वाढून कणसे झाली तेव्हा गणपती उभार कणीस झाला भुक्या माणसाच्या पोटाच्या शोधात गेला त्याने मळ्याला ओला आशीर्वाद दिला धनधान्याचा प्रसाद मोदक झाला *रावसाहेब जाधव (चांदवड)* ९४२२३२१५९६

*कॅलेंडर...* खरे तर असतो उभा मी जुन्या-नव्याच्या सीमेवर सरत्या वर्षाच्या शेवटी आणि नव्या वर्षाच्या सुरुवातीला पुन्हा एकदा... आठवणींची साठवण केलेल्या, हुकल्या-हुकवल्या, टळल्या-टाळल्या पूर्ण-अपूर्ण काही क्षणांसाहित हिशोबाचे गणित जुळवण्यासाठी सोबत घेतलेल्या तारीख, वार, दिनांकांच्या नोंदी अंगाखांद्यावर खेळवणाऱ्या कॅलेंडरची तग धरून राहिलेली काही पाने नजरेआड करत, जेव्हा टांगतो खिळ्याला नवे कॅलेंडर तेव्हाही असतो उभा मी जुन्या नव्याच्या सीमेवर पुढील काही दिवस, आठवडे कदाचित महिनेही... जे सोडू शकत नाही तारखेसोबत लिहिताना जुना वर्षांक सोबत असतानाही नव्याची... वाढत राहतो गुंता कितीतरी काळ जुन्या कॅलेंडरबाबतचा, ज्याने सजवलेला असतो कोपरा घराचा कोपरा मनाचा होत जाताना, जो विकावा मूल्यहीन रद्दीच्या भावात की जपावा मूल्यवान आठवणींचे गाठोडे म्हणून? की लोटावा कचरा म्हणून स्वतःच, इतरांनी कचरा समजण्याआधी? होत नाही निर्णय... आज पुन्हा एकदा नवे कॅलेंडर टांगून खिळ्याला चाळतोय मी पाने जुनी काही चुकून सुटून जाऊ नये या भीतीपायी राहून उभा भिंतीलगत.... ...... .... ... .. . *^रावसाहेब जाधव^*

(बालकविता) बुद्धी दे... आमच्या हिरव्या मळ्यात बाप्पा, हळूहळू ये आसनावर या आराशीतल्या, विसावा तू घे ...धृ... गाडीबीडी नको आणू चिखलात जाईल फसून शेवटी तुला उंदरावरच यावे लागेल बसून... वाट इथली बारीकशी चालायाचे हाल उंदरालाही सांग बाप्पा सांभाळून चाल... वाटेत कुठे थांबू नको वेळेआधी ये...१... डोंगर केले मोठेमोठे झाडे लावली छान निघते अन डोंगरावरून नदी एक लहान... माळा केल्या फुलांच्या बा, बल्ब लावले चार रस्तेबिस्ते करताकरता दमून गेलो फार... उजेडाला वीज मात्र सोबत घेऊन ये...२... मनातलं गुपित एक सांगायचंय तुला लहान आम्हा मुलांची पाहून घे कला... टॉवर केले मोबाईलचे डोंगरावरती दोन मोठ्या तुझ्या कानांना केवढा लागेल फोन!... अभ्यासाचे नको पुस्तक सुट्टी काढून ये...३... लाडू देऊ, मोदक देऊ आणि देऊ दुर्वा मात्र ठेव मळा आमचा हसरा आणि हिरवा... नाचू, गाऊ, आरती करू खेळ सुद्धा खेळू एक होऊ, एक राहू शिस्त सारे पाळू... धांगडधिंगा घालणाऱ्यांना मात्र जरा बुद्धी दे...४... *रावसाहेब जाधव* महालक्ष्मी नगर, चांदवड, जि. नाशिक 423101 9422321596