​​जिद्द......

सांग थोडे पावसाला कोरडा मधुमास गेला
प्यायला पाणी मिळेना तोंडचाही घास गेला !

अंत:करणातून जेव्हा नष्ट झाली ओल सारी
पोत गेला या भुईचा रांगडा सहवास गेला !

पेटलेल्या कातळावर रौद्र जळते हे निखारे
भावभोळ्या जीवनाचा जाच ना वनवास गेला !

तापले आभाळ सारे करपली निष्पर्ण झाडे
मोसमाची आस गेली व्यर्थ हर अदमास गेला !

फोडलेले आर्त टाहो का तुला ऐकू न आले ?
तू दयाळू तू कृपाळू अढळ हा विश्वास गेला !

जिंकलेल्या वेदनांना जिंकण्याची जिद्द होती
याचसाठी प्राण त्याचा लावता गळफास गेला !

अंजली राणे वाडे .
वसई .