![]() ![]() बळीराजावर आपले स्वागत आहे. |
जगणे आयुष्याचे
आयुष्यचक्रात असा गुंतलो की
स्वतःसाठी जगायचं राहूनच गेलं
इतरांच्या कलाने घेता घेता
स्वकलेला पारखायचं राहूनच गेलं
आयुष्याची पायरी चढता- चढता
मागे बघायचं राहूनच गेलं
जगण्यासाठी कमावलं पण
गमावलं ते बघायचं राहूनच गेलं
दुनियेला समजून घेता घेता
मनाला समजण राहूनच गेलं
त्यांची स्वप्ने पूर्ण करता करता
माझं स्वप्न बघायचं राहूनच गेलं
जगण्यासाठीच जगलो केवळ
पण जगणं कळायचं राहूनच गेलं
धंद्याने शरीर जगवलं खरं,पण
छंदांना जगवायचं राहूनच गेलं
अजूनही आहेत काही जीव लावणारे
त्यांना सांगायचं राहूनच गेलं
आता मलाही सापडला माझा सूर
त्यांचे आभार मानायचं राहूनच गेलं
-संदीपकुमार