गझल : उद्योग हिरवळीचा

देशात जर कृषीचा या होत घात आहे.
सरकारचा सरळ मग याच्यात हात आहे.

दररोज घोषणांच्या देतात भुलथापा,
असल्या छळात मी हा येथे रहात आहे.

वर्षानुवर्ष करुनी ऊद्योग हिरवळीचा,
आल्हाद-पण न येणे ही काय बात आहे?

मी न्याय मागुनी पण ऐकत कुणीच नाही,
अन्याय मजवरी हा का होत जात आहे?

जिंकायलाच सारे असतात खेळ खेळत,
पण हारणे नशीबी हेही जगात आहे !

झाले निदान तर मग उपचार कर म्हणावे,
आजार काय हा हो मज जन्मजात आहे?

खाणार काय सांगा शेती करून माती?
विळख्यात जर ऋणाच्या आयुष्य जात आहे!