*विश्वस्तरीय काव्य लेखन स्पर्धेसाठी - २०२४*

*विषय :- शेतमालाचे भाव*

*काव्य प्रकार :- गझल*

वृत्त :- मेनका
गालगागा गालगागा गालगा

*पुरेसा भाव द्या*

शेतमालाला पुरेसा भाव द्या
मग भले शहरास तुमचे नाव द्या

ठेवुनी बाजूस शहरे आधुनिक
चार गोष्टी बोलणारे गाव द्या

कोरडी खाऊन बघुनी भाकरी
पूर्ण ताटावर तुम्ही मग ताव द्या

द्या भुकेल्याला अगोदर अन्न अन्
मग तुम्ही देवास कुठल्या ठाव द्या

पाहिजे अपुल्या बळीचे राज्य तर
वामनाला आजच्या घेराव द्या

प्रश्न पोटाच्या भुकेचा सोडवा
मग कुणीही काळजावर घाव द्या

स्वच्छ शासन पाहिजे सेवेत तर
चोर टाळा अन् निवडुनी साव द्या

✍️
सुनिल बावणे - निल
बल्लारपूर,चंद्रपूर
८३०८३३४१२३