प्रतिक्रिया

• १५ व्या अ. भा. मराठी शेतकरी साहित्य संमेलनाचे उद्घाटन

  

  संपादक

  रवी, 06/09/2026 - 12:26. वाजता प्रकाशित केले.

  १५ व्या अ. भा. मराठी शेतकरी साहित्य संमेलनाचे उद्घाटन.

  शेतीव्यवसायाच्या समस्यांच्या कारणांचे अभ्यासक साहित्यिकांनी बनावे- संमेलनाध्यक्ष डॉ. उपेंद्र महात्मे

  युगात्मा शरद जोशी यांच्या 91 व्या जयंतीचे औचित्य साधून १५ व्या अखिल भारतीय मराठी शेतकरी साहित्य संमेलनाचे उद्घाटन शेती अर्थ प्रबोधिनी द्वारे ॲग्रिसन क्लिनिंग, ट्रेडिंग अँड प्रोसेसिंग प्लांट, छोटी आर्वी, तहसील हिंगणघाट येथे घेण्यात आले. या उद्घाटन सोहळ्यास ॲग्रीसन प्लांटचे डायरेक्टर गंगाधर मुटे आयोजक म्हणून तसेच संमेलनाध्यक्ष डॉ. उपेंद्र महात्मे, उद्घाटक अनिल जवादे, विशेष अतिथी प्रकाश गोटे, प्रमुख अतिथी प्रवीण अडेकर, स्वागताध्यक्ष सारंग दरणे यांनी उपस्थिती दर्शविली. या संपूर्ण सोहळ्याचे सूत्रसंचालन नरेंद्र गंधारे यांनी केले. भारतीय अर्थकारणामध्ये शेती व्यवसायाचा मोलाचा वाटा असून याकडे शासन व्यवस्थेने प्रभावीपणे लक्ष देण्याची गरज आहे असे उद्घाटक अनिलजी जवादे यांनी प्रतिपादन केले. शेतकरी साहित्य संमेलन आणि शेतकरी संघटना या दोहोंमधला मूलभूत फरक तसेच साम्य यावर आयोजक गंगाधर मुटे यांनी प्रकाश टाकून याविषयी साहित्यिकांनी पथ्य पाळले पाहिजे असे प्रतिपादन केले. 
   

  आता तयार व्हावे, लढण्यास लेखणीने I
  रक्षण अबोलतेचे, करण्यास लेखणीने I
  लटकी- पुचाट वाणी, शिरजोर होत आहे I
  यावे रणात गच्ची, धरण्यास लेखणीने II

   

  वरील ओळींचे सार्थक व्हावे म्हणून शेतकऱ्यांविषयीच्या कथा, व्यथा, व्यवस्था, अवस्था याऐवजी शेती व्यवसायाच्या समस्यांची गुपित कारणे आणि समस्या निर्मूलनासाठी उपाय यावर साहित्यिकांनी अभ्यासक म्हणून आपल्या लेखणीची धार वाढवावी असे वक्तव्य संमेलनाध्यक्ष डॉक्टर उपेंद्र महात्मे यांनी केले. याप्रसंगी सुरुवातीस विवेक मुटे, तेजू कोपरकर, स्वरा पोहाणे, ज्ञानेश पोहाणे या गायक चमूंनी सुंदर असे शेतकरी नमनगीत आणि मराठी गौरवगीत सादर केले. हे संमेलन 3 सप्टेंबर ते 9 सप्टेंबर च्या दरम्यान कवीसंमेलन, गझलमुशायरा, काव्यवाचन, काव्यगायन याद्वारे आभासी पद्धतीने घेण्यात येत आहे. कवी संमेलनाचे अध्यक्ष म्हणून राजेंद्र फंड, डाॅ. मनीषा रिठे, आत्माराम जाधव, सुरेखा बोरकर क्रमशः प्रतीदिवशी राहतील तसेच सूत्रसंचालनाची जबाबदारी क्रमशः प्रतिदिवशी सुनील बावणे, खुशाल गुल्हाने, बाळासाहेब गिरी, नरेंद्र गंधारे यांच्याकडे देण्यात आली आहे. काव्यवाचनाकरिता अध्यक्ष आणि सूत्रसंचालनाची दुहेरी जबाबदारी श्रीमती विद्याताई बोरुळकर, मुंबई यांच्याकडे देण्यात आली आहे. या सात दिवसीय संमेलनाच्या समारोपीय सत्रास अध्यक्षस्थानी राजेंद्र फंड, अहिल्यानगर तसेच प्रमुख अतिथी ऍडव्होकेट सतीश बोरुळकर, मुंबई हायकोर्ट आणि विशेष अतिथी म्हणून शेतकरी संघटनेचे कृतिशील साहित्यिक दिलीप भोयर हे सर्व प्रमुख्याने हजर राहतील. हे आभासी संमेलन होऊ घातलेल्या १६ व्या अ. भा. मराठी साहित्य संमेलनाची नांदी आहे. या अगोदर झालेल्या एकूण 14 अखिल भारतीय मराठी शेतकरी साहित्य संमेलनाचे श्रेय ॲग्रीसन क्लिनिंग, ट्रेडिंग अँड प्रोसेसिंग प्लांटचे डायरेक्टर गंगाधर मुटे यांना नक्कीच जाते.

  • आपली प्रतिक्रिया लिहिण्यासाठी Log in (प्रवेश करा) किंवा register (नवीन खाते बनवा)

पाने

• « प्रथम
• ‹ मागील
• 1
• 2
• 3
• 4
• 5
• 6
• 7
• 8
• 9
• …
• पुढील ›
• अंतिम »