*
'एच.आय.व्ही.' सारखा कुठूनतरी
करतो प्रवेश विषाणू कर्जाचा
करत मैत्री स्वाभिमानाशी
आणि राहतो पोखरत पेशीरचनेला
मातीच्या... आतून

लागू पडत नाही
मात्रा औषधाची कोणत्याही
आजवर संशोधित झालेल्या...

खरं तर केलं पाहिजे लसीकरण
'तरतुदींचं अर्थसंकल्पातील,'
जिथून करतात प्रवेश
विषाणू कर्जाचे
टॉनिक फवरल्याच्या दिमाखात
हवामान आणि बाजारभावाच्या अवहेलनेवर
आणि करतात बाधित
निरोगी जीवनाला
मळ्यापासून खळ्यापर्यंतच्या

आताशा मी-
वाढवू पाहतोय ताकद पेशींची माळमाथ्याच्या
लढण्यासाठी आगंतुक घुसखोरी करू पाहणाऱ्या
परिस्थितीजन्य रोगाशी
कुजण्याआधी मुळं
कारण मला टाळायचं आहे जगणं
मरणाला डिवचणारं
कदाचित बदलूही शकेन मी
बाधित 'डी.एन.ए.'
पेशीत मातीच्या घुसखोरी करून
संरचना बिघडवणारा
जगण्याची...

- रावसाहेब जाधव