निःशस्त्र चाललास कुठे मात खायला
हत्यार पाहिजेत लढाई लढायला

मेल्यात याचनेत कुळातील त्या पिढ्या
अवजार रक्षणार्थ हवे बाळगायला

असतील सापळेच तपासून घे जरा
जपुनीच टाक पाय पुढे झेप घ्यायला

ती धार लेखणीस जरा लाव तू अशी
ते शब्द पाहिजेत इथे स्फोट व्हायला

असमर्थ शांतताच प्रकटण्यास क्रांतिला
हो अस्त्र तू स्वतःच इथे कोसळायला

करतील घातपात जुने ज्ञान मानवा
अज्ञान गावरान नको वापरायला

हो सज्ज पेटण्यास तमालाच कापण्या
पाहू नकोस वाट उषःकाल व्हायला

वृत्त :~बहरे मजार कि मुजाहिफ सुरत.
लगावली :~गागाल गालगाल लगागाल गालगा