baliraja

चाकोरीबाहेरचं लिहायचा प्रयास

गंगाधर मुटे हे नाव एक दिवस असंच मायबोलीवर (जिथे माझा नेहमीच राबता असायचा-असतो) झळकलं... शेतकर्‍यांच्या प्रश्नावर तळमळीनं लिहिणारा असा कोणीतरी मायबोली परिवारात सामील झाला असं माझ त्यांच्याबद्दलच पहिलं-वहिलं मत होतं! शहरी अनुभवांची रेलेचेल असलेल्या मायबोलीवर हा नवा चेहरा सगळ्यांनीच सहर्ष स्वीकारला. शेतकर्‍यांवर-त्यांच्या प्रश्नांवर लेख लिहिणारे मुटे धीरे-धीरे मायबोलीसारख्या आंतरजालीय व्यासपीठावर बरंच काही लिहायला लागले... कविता हे मात्र त्यातलं सगळ्यात मोठं डबुलं होईल हे मला त्यांची पहिली कविता वाचतांना वाटलं नव्हतं...

लिखाणामधे खूप विविधता

"रानमेवा" कविता संग्रह पाहिला....as usual, जबरदस्त आहे.... काही काही कविता मायबोलीवर आधी वाचल्या होत्या, तरीही पुन्हा वाचताना नव्याने अर्थ उलगडत गेला. प्रत्येक कविता ही आधीच्या कवितांपेक्षा वेगळी आहे आणि मुटेंच्या शब्दशैलीबद्दल तर मी काय बोलावे? एखादी कविता अगदी साध्या शब्दात तर एखादी एकदम लयबध्द वृत्तामध्ये बांधलेली... खूपच सुंदर..! “नागपुरी तडका” आणि "प्राक्तन फ़िदाच झाले" ही गझल लिहिणारी व्यक्ती एकच आहे यावर विश्वास बसत नाही.... मुटेंच्या लिखाणामधे खूप विविधता आहे.....!!!

सडेतोड लेखणीतून वास्तवचित्र

कविता वाचणे किंवा कवितेत रमणे हा माझा छंद निश्चितच नाही. किंबहुना, कविता सोडून इतर साहित्य प्रकार वाचणे हाच माझा छंद! परंतु श्री मुटे साहेबांच्या कविता 'मायबोली' संकेतस्थळावर वाचनात आल्यानंतर मला त्यांच्या कविता आवडू लागल्या. शेती आणि ग्रामीण जीवनाबद्दलची त्यांची तळमळ लक्षात आली. ग्रामीण जीवनाचे केवळ काव्यात्म आणि आभासी वर्णन न करता सडेतोड लेखणीतून वास्तवचित्रच समोर उभे करणे ही श्री मुटे साहेबांची खासियत आहे.

लिखाण अतिशय प्रामाणिक

“रानमेवा” या पहिल्या वहिल्या कविता संग्रहाला मनापासून शुभेच्छा !!

अभ्यासपूर्ण आणि अस्सल काव्य

अभ्यासपूर्ण आणि अस्सल काव्यातून मुटेजींनी, परिस्थितीने पिचलेला, गांजलेला शेतकरी, त्याचं वास्तव जीवन, त्याची दु:खं अगदी स्पष्टपणे, सडेतोड मांडलंय, याच बरोबर या बळीराजावर शासनाकडून आणि अनेक बाजूनी होणाऱ्या अन्यायावर तर त्यांनी आसूड ओढले आहेत.

मुटेजींच्या या कविता वाचून तर माझ्यासारख्या अनेक शेतकऱ्यांना नक्कीच थोडा आधार मिळेल, नवी उभारी मिळेल यात शंका नाही.

"रानमेवा" या पहिल्या काव्यसंग्रहास माझ्या हार्दिक शुभेच्छा !

अनुभवांची शिदोरी आणि सृजनशीलतेची समृद्धी

इतका सुंदर आणि वैविध्यतेने नटलेला ’ओला’मेवा प्रकाशित करीत असल्याबद्दल प्रथम धन्यवाद. मुटे यांच्या निसर्गप्रेमावरील कविता छान असायच्या. त्यात अजून भर घालून त्यांनी देशप्रेम,वस्तुस्थिती,सामाजिक असे वेगवेगळे विषय हाताळले आहेत. गंमत म्हणजे निव्वळ लिहायचे म्हणुन त्यांनी लिहिले नसून ते अंतर्मनाने लिहिले गेले आहे. त्यांच्याबद्दल मला विशेष आदर आहे, तो यासाठी की ते खूप विनम्र आणि प्रांजळ आहेत. काव्य या प्रकाराचा ते आदर करतात आणि त्याविषयी आपले मत प्रदर्शनही करतात.

एक “अनुभवसिद्ध रानमेवा”

वर्धा हा महाराष्ट्रातील एक छोटासा जिल्हा, पण बहूपरिचित अशी ही भूमी. सर्वच सेवा कार्यात अग्रेसर असा परिचय असलेली. ‘वरदा’ या पवित्र संतसंगी मायगंगेने आपले कृपेचे आवरण दिले म्हणूनच या जिल्ह्याला ’वर्धा’ हे नाव पडले. ही भूमीराष्ट्रपिता म.गांधी,राष्ट्रसंत तुकडोजी महाराज,संत विनोबा भावे यांच्या चरणस्पर्शाने व विचाराने पवित्र झालेली, म्हणूनच संपूर्ण देशात या जिल्ह्याचा वैशिष्ट्यपूर्ण परिचय आहे. या जिल्ह्यात कवी,लेखक,कीर्तनकार, समाजसेवक, दानशूर कार्यकर्ते भरपूर आहेत.

श्रीगणेशा..!! नमन करतो श्री गणेशा, वक्रतुंडा रे परेशा लेखना प्रारंभ करतो, तरल शब्दा दे परेशा शक्य करसी तू अशक्या, गम्यता देसी अगम्या लक्ष अपराधास माझ्या, तूच पोटी घे परेशा तू गजानन निर्विकल्पा, फेड माझ्या तू विकल्पा वेल कवितेची चढू दे, वृक्ष तू व्हावे परेशा तूच माझा सोयरा रे, पाठराखा तू सखा रे तूच माझा भाव भोळा, मधुरसे गाणे परेशा अभय कविता देखणी तू, वृत्त्त तू, स्वरशब्द तू रे अंत्ययमका संग दे ते यमक तू माझे परेशा