जागतिक दर्जाच्या हवेतील वाढदिवस

मागील वर्षीचा माझा वाढदिवस २४ तासाच्या ऐवजी साडेवीस तासांचाच होता. २७/०२/२०१९ ला मी इस्त्राईल मध्ये होतो. इस्त्राईलचे घड्याळ भारतापेक्षा साडेतीन तास मागे असते. 

म्हणजे असे की माझी २७ तारीख सुरुवात झाली आणि माझा मेनी मेनी हॅपीवाला सुदिन सुरु झाला तेव्हा इजरायल घड्याळात रात्रीचे १२ आणि  भारतीय घड्याळात पहाटेचे साडेतीन वाजलेले होते. 

मी २७ तारखेलाच इजरायल वरून भारताकडे निघाल्याने माझ्या त्या दिवसाची सुरुवात इजरायलघड्याळानुसार झाली आणि त्याच दिवशी भारतात पोचल्याने माझ्या २७ तारखेचा समारोप भारतीय घड्याळानुसार झाला. म्हणजे माझी २७ तारीख दोन्ही देशांच्या प्रमाणवेळेचा हिशेब करता २४ तासाऐवजी फक्त २०.३० तासांचीच होती. काही का असेना हा वाढदिवस मात्र माझ्यासाठी विस्मरणीय झाला. त्याचप्रमाणे २७ तारखेला माझा इज्राएल, इथोपिया आणि भारताच्या भूपृष्ठाला चरणस्पर्श झाल्याने  हा वाढदिवस जागतिक दर्जाचा ठरला, असेही म्हणावे  लागेल.  
 

खरं त्यादिवशी माझा वाढदिवस आहे हे कुणालाच माहित नव्हते. मी स्वतःहून सांगण्याचे तर अजिबातच प्रयोजन नव्हते. दिवसभर सतत  विमानात असल्याने देशातून कॉल येऊन त्या चर्चेतून सुगावा लागण्याची शक्यता नव्हती. 
 

पण..... 
 

पण फेसबुकने चुगलखोरी केली. इथोपियाला विमान बदलण्यासाठी थांबलो असता नेट कनेक्शन मिळाले आणि तीच संधी साधून ही "केकबातमी" फेसबुकने सहकारी मित्रांपर्यंत पोचवली. मग काय वाढदिवसाचा समारंभ अगदी हवेत म्हणजे विमानातच पार पडला.

त्या सर्व सहकाऱ्यांचे आभार मानायचे राहून गेले होते. आज संधी मिळाली. इज्राएल अभ्यास दौऱ्यातील सर्व सहकारी मित्र-मैत्रिणींचे मनःपूर्वक आभार.
 

- गंगाधर मुटे

========