आनंदाचे मोती

आनंदाचे मोती

खाली पाचू विखूरले,
नभ जांभूळले वर
दह्यासारख्या धुक्याने
पुरे माखले डोंगर!

चांदी दुधाळत वाहे
नदी नागीणीची सखी
वेल डांगराची फुले
होई छप्पर पालखी!

मका मिशीतून हासे
केळी गर्भार लाजती
धुंद संभारगंधात
पीकं डौलात डोलती

बघे सुखावत डोळे
गोठ्यातून बैलजोडी
येई हिरव्या चा-याला
पोळ्या-पुरणाची गोडी

असे घडो दरसाल
यावी घरभर पोती
मुखी सुखाची भाकर
डोळी आनंदाचे मोती!

~राजीव मासरूळकर
सावंगी, औरंगाबाद
दि.17/09/16