कर तृप्त पावसाने

भेगाळल्या भुईला कर तृप्त पावसाने
वागू नको ढगा तू या माणसाप्रमाणे

नात्यात आपल्या ह्या सुरवात कर नव्याने
प्रिये समान तू ही सांगू नको बहाने

स्वीकारते तुला रे गर्जू नकोस नुसता
तक्रार मांडली ना मातीतल्या घराने

रानी वनी कुठेही नाही तुझा भरोसा
करणार मग कशाला हा मोर नाच गाणे

नेत्या समान तू ही आलाच ना भुईवर
येईल का कृषीतुन वर्षात चार दाने

त्या मेघगर्जनेचे हे भास पावसाळी
थेंबाविना करपले अंकूरले बियाणे

बदनाम तू जरीही करतो धरेस हिरवी
देशात वाळवंटी ये चोर पावलाने

भरण्यास ये सखींचे आहेत माठ रीते
रानातल्या नद्या ही विकल्यात शासकाने

चाले ह्रदय जगाचे, अन्नावरी कृषी च्या
पण भाव ना मिळेना पेट्रोलच्या दराने

केले फितूर जर का धिरज इथे ढगाला
ताटात भाकरी ह्या भिजतील आसवाने