कोरोना काळ आणि भाजीपाला पिकाला मीळालेला भाव
कोवीड १९ मूळे संपूर्ण जगात धास्ती आणि भितीचे वातावरण पसरले होते . भारत सरकारने मार्च २०२० ला संपूर्ण लाॅकडाऊन चा आदेश काढला.त्यानंतर हळूहळू लाॅकडाऊन वाढतच गेले. आमच्या कडे थोडीशी बागायती शेती असून आमच्या परीसरातील अनेक शेतकरी हे साधारणतः इतर पीकांबरोबर भाजीपाला पीकाचे उत्पादन घेऊन आपल्या कुटुंबाचा उदरनिर्वाह चालवतात. गाव अकोला शहरापासून साधारणतः १२ कि. मी. अंतरावर असल्याने पूर्वी बैलगाडीने आणि आजच्या काळात भाड्याच्या वाहनानी शेतकरी आपला शेतमाल, भाजीपाला मंडईत आणि बाजार समितीत पोहोचवतात.
आमच्या वडीलांनी कोवीड परीस्थीतीत मे महिन्याच्या दुसऱ्या आठवड्यात भाजीपाला वर्गीय पालकाचे पीक घेण्याचे ठरविले. उपलब्ध पाणी स्रोताचा विचार करून त्यासाठी पाऊन एकर जागेवर नियोजन केले, शेत तयार झाले, वाफे वगैरे तयार करून पालकाचे बी शेतात टाकले. संपूर्ण लॉकडाऊन असल्यावरही शेतीकामास मुभा होती,हे बरेच होते. संपूर्ण मशागती नंतर पालक पीक एक महिन्यात तयार झाले. पालक काढणीस आला त्याची काढणी सुरू केली. गाडीवान आणि भाजी बाजारातील कमीशन एजंट दोघेही अतिशय प्रामाणिक आणि ईमानदार व्यक्ती. तसा त्यांच्याशी असलेल्या अनेक वर्षे संबधातून ही खात्री निर्माण झालेली.दुपारी चार नंतर पालकाची काढणी करायची ,पालक शेतात धुऊन बैलगाडीने घरी न्यायचे,रात्री पालकाच्या जुळ्या उभ्या करायच्या . कारण त्याचे पॅकींग संध्याकाळीच केले तर तो खराब व्हायची शक्यता अधिक .रात्री दोन वाजता उठायचे, पालक फारी मध्ये रचून बांधायचा सकाळी ४.०० ला गाडीवान गाडीत गावातील आमच्या मालासह इतरांचा माल घेऊन जायचा.मालाचा तुडवडा असल्याने भाजीपाला मंडईत दिवस उजाडण्या पूर्वी माल विकला जायचा. तो ही इतर वेळच्या भावापेक्षा तिप्पट तर कधी चौपट भावात.शहरातीलच नव्हे तर बाहेरगावाहून आलेलेही विक्रेते बाजारात यायचे, उशीरा आलेल्यांना रिकामा हाताने परत जावे लागत असे.तुडवड्यामुळे भाजीपाला विक्रेते चढ्या भावाने माल खरेदी करत असत.भाजीपाला विक्रेत्यांना तो माल प्रशासनाने सुट दिलेल्या सकाळी ९.०० ते १२.०० या वेळेतच विकावा लागायचा. त्यामूळे त्यांच्याकडचाही माल तीन तासात संपून जायचा.कमीशन एजंट विकलेल्या मालाची पट्टी पैशांसह गाडीवाल्याकडे पाठवून द्यायचा.सकाळी ८.०० पर्यंत विकलेल्या मालाचे पैसे हातात पडायचे.
पुढील काही दिवस शेतातील पालकाचे पिक संपेपर्यंत हे चालले.त्या भितीदायक आणि नकारात्मक काळात या पिकाने पावसाळ्याच्या सुरूवातीलाच समाधानकारक आर्थिक लाभ दिला. नेहमी शेतमालाच्या भावाची चिंता सतावत असते . पण हा काळ भाजीपाला पिकाच्या बाबतीत सुखावह ठरला असेच म्हणावे लागेल .
-निलेश जगदेवराव देवकर .
मु.पो.डोंगरगाव ता.जि.अकोला.444104
मो.क्र.9604919343.
e mail- nileshdeokar35@gmail.com
