शेतकरी गीत

शीर्षक:-रास

पीक आलं बहरत कणीस भरलं टपोरं
हाती गोफण घेऊन गंगू तू पाखरं //धृ//

रानात मचांगी बसून मी करतो राखण
रान बघ हिरवंगार कसं दिसती देखणं
पिवळं कणीस बांधलंय हळदीचं काकण
हाती गोफण घेऊन गंगू तू हाकल पाखर //१//

पक्षी करती किलबिल बसूनी कणीसावर
आनंदाने उडत दाणे खाती पोटभर
आले दिस सुगीचे जणू सोन्याची घागर
हाती गोफण घेऊन गंगू तू हाकल पाखरं //२//

रानी सळसळ पानांची कानी मधुर नाद
राणी ऐकून सारे मनास होई मोद
सजवल्या स्वप्नांना मिळे निसर्गाची दाद
हाती गोफण घेऊन गंगू तू हाकल पाखरं //३//

कृपा निसर्गाची आलं आनंदी उधाण
करूया रक्षण राखू निसर्गाचा ग मान
दाण्यांनी भरेल ओंजळ मिळालं हे दान
हाती गोफण घेऊन गंगू तू हाकल पाखरं //४//

आस रासेची पूर्ण पडेल दुधात साखर
फिटे डोळ्यांचं पारणं ढीग तो भरपूर
मिळेल पोटभर अन्न पडे आनंदात भर
हाती गोफण घेऊन गंगू तू हाकल पाखरं //५//

सौ. वर्षा मनोज भांदर्गे
अमरावती
7709745199