विलगीकरण

विश्वस्तरीय लेखन स्पर्धा
विषय- शेती आणि करोना
लेखन प्रकार- छंदमुक्त कविता

शिर्षक- विलगीकरण

इथल्या निरागस मातीत पेरून
तथाकथित जागतिकीकरणाचे विषाणू
तुम्ही चालवले आहे विलगीकरण
मातीपासून माणसाचे.....
माणसापासून माणसाचे.

वावराच्या वेदनेशी कधीच
दाखवली नाही सलगी
बाजारसमितीमधील ढेरपोट्या खुर्च्यांनी.
आमचे हक्क झाले आहेत आयसोलेट
लालफितींच्या निगरगट्ट गाठींमध्ये.

आम्ही मात्र नेमाने येणाऱ्या सर्व
गारपीटी झेलत भरवत राहिलो तुम्हाला
आमच्या हिस्स्याचा घास...
आयुष्याची आकण कांडता कांडता
आम्ही झालो आहोत मरणाची खुराक.
तुमची इम्यूनिटी तुम्हाला लखलाभ !

आमच्या ओठांंचे होते विलगीकरण
हातात आलेल्या घासापासून हरसाल....
तरीही आम्ही नाही होऊ शकत विलग
या मातीपासून..... तहहयात !
आणि ...त्या नंतरही !

प्रदीप देशमुख
चंद्रपूर