आता पेटवा मशाली

आता पेटवा मशाली

खुप झाल्या बाता, आता वेळ आली
खुप जळाल्या चिता, आता पेटवा मशाली...

एकच भिती आता, वादळाची वेळ आली
डोळया समोर माझ्या, भुई सपाट झाली
पुरात पिक जाता, सख्खाही बघतो खाली
खुप जळाल्या चिता, आता पेटवा मशाली...

घरात आमच्या आता, अशी अवकळा आली
आजारी असतो पिता, आई कधिच गेली
सनात आमच्या आता, ताटही असते खाली
खुप जळाल्या चिता, आता पेटवा मशाली...

करुन भाकड बाता, अशी कमाई केली
कुनी झाले नेता, काही बनले वाली
हाती येताच सत्ता, तुलाच विसरुन गेली
खुप जळाल्या चिता, आता पेटवा मशाली...

साथ कुनाची आता, आम्हीच सोडुन दिली
हिंमत लक्षात येता, किंमत खरी कळाली
दुखाच सावट असता, हसु असुद्या गाली
खुप जळाल्या चिता, आता पेटवा मशाली...