घे मशाली

शासनाच्या सवे मेघही पांगले
कास्तकारा तुझे दैवही बांधले

कोण देतो तुझ्या पाय पोटावरी
का कळेना तुला नेमके चांगले

तेच झाले तुझे आज मारेकरी
काल पायापुढे जे तुझ्या रांगले

झोप आली तुला जागता जागता
त्याच पायी तुझे दैन्यही लांबले

काय अपराध माझा कळेना मला
सांग जे कष्टले तेच का गांजले

इंडियाच्या गुलामीत ताजी सुखे
भारताच्या घरी का शिळे रांधले

पारतंत्र्यात स्वातंत्र्य धास्तावले
सैनिकांनो वृथा रक्त का सांडले

घे मशाली अभय आज हातामधी
का असे शस्त्र खुंटीवरी टांगले